ВЫЙШАЎ ЧАРГОВЫ НУМАР ЧАСОПІСА “АХОВА ПРАЦЫ І САЦЫЯЛЬНАЯ АБАРОНА” (№ 1/2023)
У першым нумары часопіса чытачы пазнаёмяцца з вопытам работы брэсцкага ААТ “СтіМ” – кампаніі са складанай металаёмістай вытворчасцю, дзе здолелі стварыць надзейную аснову для зніжэння рызык і эфектыўнай прафілактыкі вытворчага траўматызму.
Грунтоўную размову аб тым, як арганізаваць работы з хімічнымі рэчывамі ў адпаведнасці з патрабаваннямі бяспекі, прапануе ў сваім артыкуле галоўны тэхнічны інспектар працы Магілёўскай абласной арганізацыі Беларускага прафсаюза работнікаў мясцовай прамысловасці і камунальна-бытавых прадпрыемстваў П. Я. Краўчынскі.
Адным з самых складаных відаў работ на вышыні з’яўляюцца верхалазныя, найболей небяспечныя для жыцця і здароўя. Пра меры, якія неабходна рэалізаваць для іх бяспечнага правядзення, ідзе гаворка ў артыкуле спецыяліста у сферы працоўнага права і заканадаўства аб ахове працы А. І. Штэйнера.
Сёлета ў многіх арганізацыях пройдзе чарговая атэстацыя працоўных месцаў па ўмовах працы. Аб парадку і асаблівасцях яе правядзення на старонках часопіса расказвае начальнік упраўлення дзяржаўнай экспертызы ўмоў працы камітэта па працы, занятасці і сацыяльнай абароне Мінскага аблвыканкама А. М. Кавалёва.
Да чаго прыводзяць парушэнні пры эксплуатацыі пад’ёмна-транспартнага абсталявання і механізмаў, на канкрэтным прыкладзе тлумачыць кансультант упраўлення нагляду за выкананнем заканадаўства аб ахове працы Дэпартамента дзяржаўнай інспекцыі працы Міністэрства працы і сацыяльнай абароны Рэспублікі Беларусь В. В. Расолава.
З іншых матэрыялаў у рубрыцы “Расследаванне і аналіз” чытачы даведаюцца аб прычынах няшчасных выпадкаў, якія прывялі да цяжкіх наступстваў: на Віцебшчыне пры эксплуатацыі ацяпляльнай сістэмы прычэпа-дачы атручэнне вокісам вугляроду атрымаў машыніст тралёвачнай машыны, а на Магілёўшчыне пры абслугоўванні палівападачы электрастанцыі з паўтараметровай вышыні сарваўся рабочы-машыніст.
Таксама ў нумары – прыкладная інструкцыя па эксплуатацыі вогнетушыцеляў, агляд дакументаў, якія рэгламентуюць работу арганізацый па забеспячэнні электрабяспекі, новаўвядзенні ў правядзенні дыспансерызацыі.
У дадатку да часопіса – пастанова Савета Міністраў Рэспублікі Беларусь ад 21 лістапада 2022 г. № 794 “Аб ахоўных зонах электрычных сетак, памерах і рэжыме іх выкарыстання”.
Ю. А. Бяствіцкі, otsz.by
Усе навіны