Дэкада кібербяспекі: спынім ашуканцаў
Для эфектыўнага процідзеяння кіберзлачыннасці, яе прафілактыкі і павышэння лічбавай пісьменнасці насельніцтва МУС Рэспублікі Беларусь сумесна з зацікаўленымі арганізацыямі па 1 снежня 2021 г. праводзіць акцыю “Дэкада кібербяспекі”.
У Міністэрстве лічаць: з прычыны актывізацыі кібермахляроў як у краіне, так і за яе межамі неабходна павышаць узровень пісьменнасці нашых грамадзян у сферы IT-бяспекі, навучаць іх не паддавацца на хітрыкі шарлатанаў.
Каб засцерагчы сябе і свае фінансы ад замахаў у сеціве, прадстаўнікі Міністэрства ўнутраных спраў рэкамендуюць выконваць шэраг нескладаных правіл. У прыватнасці, не прытрымлівацца інструкцый незнаёмых людзей, якія патэлефанавалі з невядомага нумара, не здзяйсняць ніякіх дзеянняў на смартфоне па просьбе старонніх асоб і не паведамляць ім свае персанальныя звесткі, не пераводзіць незнаёмым людзям грошы ў якасці папярэдняй аплаты.
Таксама рэкамендавана ўстрымацца ад карыстання вайфай-сеткамі ў грамадскіх месцах, не пераходзіць па незнаёмых спасылках, якія могуць весці на фішынгавы сайт, які дазваляе рассакрэціць ваш лагін, пароль і іншыя персанальныя дадзеныя. Фішынгавая спасылка можа прыйсці ў мэсэнджэр, па электроннай пошце ці ў СМС-паведамленні.
Любыя падазроныя лісты ў электроннай пошце лепш выдаліць, не адкрываючы, таксама важна не размяшчаць персанальную і кантактную інфармацыю пра сябе ў адкрытым доступе.
Для шырокага інфармавання грамадзян мэтазгодна размясціць адпаведную інфармацыю на сайтах і інфармацыйных стэндах дзяржаўных органаў, арганізацый і прадпрыемстваў, выкарыстоўваць яе ў ходзе сустрэч з працоўнымі калектывамі.
Ю. А. Бяствіцкі, otsz.by