Смяротная вышыня
У аграгарадку Калодзішчы Мінскага раёна пры выкананні работ па рамонце складскога даху з вышыні каля 12 метраў сарваўся начальнік групы складской і ўласнай гаспадаркі адной з арганізацый.
Як паведамляецца на сайце Следчага камітэта Рэспублікі Беларусь, нягледзячы на рэанімацыйныя мерапрыемствы, праведзеныя ва ўстанове аховы здароўя, ад атрыманых пашкоджанняў 57-гадовы мужчына памёр.
З удзелам эксперта і супрацоўніка Дэпартамента дзяржаўнай інспекцыі працы на месцы трагедыі была зафіксавана следовая карціна, прызначана экспертыза, а таксама праведзены праверачныя мерапрыемствы. Падчас агляду месца здарэння следчыя ўстанавілі: работы на вышыні праводзіліся з парушэннямі правілаў бяспекі будаўнічых работ, у прыватнасці, без спецыяльных сродкаў індывідуальнай абароны.
Па факце парушэння правілаў бяспекі будаўнічых работ, якія прывялі да смерці чалавека па неасцярожнасці (ч. 2 арт. 303 Крымінальнага кодэкса Рэспублікі Беларусь), распачата крымінальная справа.
Для ўстанаўлення прычын, якія прывялі да вытворчай траўмы са смяротным зыходам, следчыя дапытваюць работнікаў арганізацыі, дзе працаваў загінулы, вывучаюць канфіскаваныя нарматыўныя і тэхнічныя дакументы, якія датычацца арганізацыі работы па ахове працы, тэхнікі бяспекі, кантролю з боку службовых асоб арганізацыі. Прадстаўленне аб выяўленых парушэннях заканадаўства будзе накіравана ў кампетэнтныя органы.
Ю. А. Бяствіцкі, otsz.by
Усе навіны