Мароз: дарога стане небяспечней
Паводле ацэнкі сіноптыкаў, гэты тыдзень абяцае сюрпрызы ў выглядзе значнага пахаладання і галалёду на дарогах.
Як паведамілі рэдакцыі часопіса «Ахова працы і сацыяльная абарона» ў аддзеле агітацыі і прапаганды ДАІ Мінгарвыканкама, ва ўмовах рэзкага пахаладання кіроўцам варта больш старанна сачыць за тэхнічным станам аўтамабіляў, асабліва тых, якія працуюць на дызельным паліве. Нізкія тэмпературы могуць стварыць шэраг неспадзяваных праблем, і перш за ўсё паралізаваць працу акумулятара, што не дазволіць запусціць рухавік аўтамабіля. Не выключана замярзанне тэхнічных вадкасцяў у сістэмах аўтамабіля. Таму важна ведаць, пры якіх мінімальных тэмпературах нармальна функцыянуюць вузлы і агрэгаты аўтатранспартнага сродку.
Пры куплі шкламыйнай вадкасці варта звярнуць увагу на анатацыю, у якой вытворца абавязаны паказаць тэмпературу яе замярзання.
Пры падрыхтоўцы да далёкай паездкі варта прадбачыць, што можа спатрэбіцца падчас экстымальнай сітуацыі ў дарозе. Так, неабходна паклапаціцца аб цёплых рэчах і тэрмасе з гарачай гарбатай, поўнай зарадцы мабільнага тэлефона, буксіровачным фале, рыдлёўцы, а таксама правадах для «прыкурвання» ад іншай акумулятарнай батарэі.
Мабыць, самае важнае патрабаванне ва ўмовах халадоў – выкананне правілаў дарожнага руху, адэкватная ацэнка дарожнага пакрыцця, на якім могуць быць участкі са схаваным галалёдам.
Сталічная Дзяржаўтаінспекцыя таксама нагадвае, што, калі ў дарозе вам спатрэбілася дапамога, паведаміце аб сваёй просьбе па тэлефоне 102. Экіпажы ДПС заўсёды арыентаваны на аказанне пасільнай дапамогі ўдзельнікам дарожнага руху, якія апынуліся ў складанай сітуацыі.
Ю. А. Бяствицкі, otsz.by
Усе навіны