Будаўніцтва: курс на зніжэнне рызыкі
Як вядома, будаўніцтва заўсёды спалучана з тымі ці іншымі небяспекамі. Менавіта таму адным з асноўных акцэнтаў Міжнароднай спецыялізаванай выставы “Будпрагрэс-2021”, якая адбылася нядаўна і была арганізавана ЗАТ “Мінскэкспа”, стала пытанне забеспячэння работнікаў сучаснымі сродкамі індывідуальнай абароны.
У выставе ўзялі ўдзел як беларускія кампаніі, так і прадпрыемствы з Індыі, Латвіі, Расіі і Украіны. Поруч з інавацыйнымі ўзорамі будаўнічай тэхнікі і матэрыялаў увазе наведвальнікаў былі прапанаваны і традыцыйныя тэхналогіі ўзвядзення і абагравання жылля, якія прайшлі выпрабаванне часам, і, як высветлілася, зусім не страцілі сваёй актуальнасці. Як адзначыў намеснік Міністра архітэктуры і будаўніцтва А. Д. Швец, такія мерапрыемствы дазваляюць удзельнікам зарыентавацца на рынку і вызначыць напрамкі для далейшага развіцця.
Пры гэтым, пра якія б работы ні ішла гаворка, адным з найбольш актуальных сёння застаецца пытанне бяспекі персаналу. І зусім не выпадкова павышаную цікавасць выклікаў семінар “Бяспека ў будаўнічай галіне. Навінкі сродкаў індывідуальнай абароны», які адбыўся ў рамках форуму “Інавацыі ў будаўніцтве 2021”. Яго ўдзельнікі – спецыялісты па ахове працы розных прадпрыемстваў рэспублікі – пазнаёміліся з навінкамі на рынку СІА і тымі магчымасцямі, якія яны забяспечваюць.
Да прыкладу, на семінары былі прадэманстраваны пальчаткі, якія дазваляюць эфектыўна пагасіць сілу ўдару і пазбегнуць сур'ёзных пашкоджанняў рук. Таксама слухачы даведаліся, пры выкананні якіх работ будзе карысны экзашкелет, якія інавацыйныя распрацоўкі дазваляюць найбольш паспяхова прадухіляць шкоднае ўздзеянне пры работах з газаэлектразваркай, што прапануецца для вырашэння адной з самых актуальных праблем галіны – забеспячэння бяспекі пры рабоце на вышыні.
І. А. Раманаўская
Усе навіны