Падтрымаем акцыю «За бяспеку разам»
На прадухіленне пажараў у асенне-зімовы перыяд нацэлена акцыя Міністэрства па надзвычайных сітуацыях "За бяспеку разам», якая пройдзе ў рэспубліцы з 16 кастрычніка па 1 лістапада.
Як адзначыў начальнік упраўлення нагляду і прафілактыкі МНС Д. М. Турчын на прэс-канферэнцыі ў Нацыянальным прэс-цэнтры, за 9 месяцаў 2019 г. колькасць пажараў у краіне ўзрасла на 5%. І хоць колькасць загінулых у іх людзей скарацілася, сітуацыя застаецца трывожнай. Больш за палову пажараў адбываецца ў ацяпляльны перыяд, самы напружаны месяц - снежань.
Мерапрыемствы акцыі «За бяспеку разам» разлічаны на прадухіленне узгаранняў у гэты час і закрануць перш за ўсё жылы сектар, дзе да пажараў часта прыводзіць ігнараванне патрабаванняў бяспекі.
Ва ўзаемадзеянні з МУС, Міністэрствам аховы здароўя, Мінэнерга і Мінжылкамгасам, МНС правядзе абследаванне жылля асобных катэгорый грамадзян. У першую чаргу з праверкай прыйдуць да пажылых людзей, інвалідаў, тых, хто пражывае адзін або знаходзіцца ў сацыяльна небяспечным становішчы, сем'яў з дзецьмі. Таксама пройдуць абследаванні па заявах грамадзян. Спецыялісты ацэняць стан электраправодкі і пячнога ацяплення. Выяўленыя недахопы будуць аператыўна ўхіляцца ва ўзаемадзеянні з мясцовымі ўладамі.
Працягнецца работа і па ўстаноўцы аўтаномных пажарных апавяшчальнікаў – у адпаведнасці з дзяржпраграмамі, якія прадугледжваюць выдзяленне грошай на іх закупку. Па словах Д. М. Турчына, апавяшчальныя прылады неаднаразова пацвярджалі сваю эфектыўнасць – у 2018 г. дзякуючы АПА на пачатковай стадыі ліквідавана 104 узгарання. Работнікі МНС выратавалі 110 чалавек, у тым ліку 17 дзяцей. У 2019 г. прыборы зафіксавалі 66 пажаранебяспечных выпадкаў. Усяго за час эксплуатацыі апавяшчальнікаў у краіне выратавана 2328 чалавек.
Ю. А. Бяствіцкі, otsz.by
Усе навіны