Адзіныя патрабаванні да сістэм упраўлення аховы працы ў арганізацыях распрацуюць у Беларусі

30 красавіка, Мінск /Кар. БЕЛТА/. Адзіныя патрабаванні да сістэм упраўлення аховы працы ў арганізацыях распрацуюць у Беларусі, паведаміў карэспандэнту БЕЛТА начальнік упраўлення аховы і дзяржаўнай экспертызы ўмоў працы Міністэрства працы і сацыяльнай абароны Іван Карчэўскі.

Паводле яго слоў, вопыт прымянення закона "Аб ахове працы" паказаў, што ў яго неабходна ўносіць пэўныя карэкціроўкі. У прыватнасці, нягледзячы на задачу па ўкараненні ва ўсіх арганізацыях сістэмы кіравання аховы працы, адзіных патрабаванняў да гэтых сістэм пакуль няма. Таму ў закон плануецца ўнесці канкрэтныя нормы, якія будуць рэгуляваць гэтае пытанне.

Іван Карчэўскі растлумачыў, што ў адпаведнасці з законам аб ахове працы наймальнік абавязаны распрацоўваць і ўкараняць у арганізацыі сістэму кіравання аховай працы, якая забяспечвае ацэнку рызык і кіраванне гэтымі рызыкамі. Цяпер такія сістэмы распрацоўваюцца на падставе або стандартаў, або рэкамендацый, зацверджаных Міністэрствам працы і сацыяльнай абароны.

"Каб прыйсці да нейкай аднастайнасці, плануем укараніць агульнае патрабаванне, якое наймальнік павінен будзе выканаць у абавязковым парадку незалежна ад таго, па якім дакуменце (стандарту або рэкамендацыям Мінпрацы) сістэма ўпраўлення аховы працы распрацоўваецца", - сказаў Іван Карчэўскі.

Ён заўважыў, што асноўныя патрабаванні павінны быць адзінымі для ўсіх - як малых арганізацый, так і буйных прадпрыемстваў са шматтысячным калектывам.

Рэкамендацыі па распрацоўцы сістэмы кіравання аховай працы ў арганізацыі былі зацверджаны Міністэрствам працы і сацыяльнай абароны загадам нумар 108 ад 30 снежня 2019 года. У іх адлюстраваны асноўныя напрамкі работы па ахове працы, якімі павінны быць мерапрыемствы па прадухіленню прафесійных рызык. Даны падказкі для вызначэння паўнамоцтваў службовых асоб па пытаннях аховы працы, кантролю за выкананнем мер па прафілактыцы вытворчага траўматызму і іх эфектыўнасці. Указана, што асабістая адказнасць работнікаў за выкананне патрабаванняў па ахове працы можа быць узмоцнена з дапамогай персаніфікаванага ўліку дапускаемых імі парушэнняў такіх патрабаванняў.

Акрамя таго, у рэкамендацыях закладзены падыходы да арганізацыі прафілактыкі вытворчага траўматызму, якія аб'ядноўваюць тры напрамкі - бяспеку, гігіену працы і дабрабыт работнікаў на ўсіх узроўнях вытворчасці, прадугледжаныя ў канцэпцыі "Нулявы траўматызм".-0-

Крыніца: БЕЛТА 

Усе навіны