Белстат вывучыць выкарыстанне сутачнага фонду часу насельніцтвам
2 красавіка, Мінск /Кар. БЕЛТА/. Белстат з 1 красавіка 2024 года па 31 сакавіка 2025 года праводзіць выбарачнае абследаванне дамашніх гаспадарак для вывучэння выкарыстання сутачнага фонду часу насельніцтвам. Аб гэтым паведамілі БЕЛТА у камітэце.
Абследаванне праводзіцца пры падтрымцы Фонду ААН у галіне народанасельніцтва (ЮНФПА) у рамках рэалізацыі праекта міжнароднай тэхнічнай дапамогі. Асноўная яго мэта - атрыманне афіцыйнай статыстычнай інфармацыі аб размеркаванні сутачнага фонду часу насельніцтва па напрамках яго выкарыстання, выяўленне адрозненняў у выкарыстанні сутачнага фонду часу паміж рознымі сацыяльна-дэмаграфічнымі групамі насельніцтва, вывучэнне размеркавання аплатнай і неаплатнай працы паміж жанчынамі і мужчынамі.
"Правядзенне абследавання бюджэту часу дазволіць актуалізаваць індыкатары, якія характарызуюць якасць жыцця насельніцтва, вывучыць гендэрныя адрозненні ў выкарыстанні часу на паўсядзённыя віды дзейнасці, баланс паміж працай і вольным часам для жанчын і мужчын у розных тыпах хатніх гаспадарак, прадаставіць актуальную інфармацыю для выкарыстання пры вартаснай ацэнцы неаплатнай працоўнай дзейнасці па аказанні дамашніх паслуг, распрацоўцы і маніторынгу выканання дзяржаўных сацыяльных праграм у галіне працы, культуры, сям'і і моладзі", - адзначылі ў Белстаце.
Да ўдзелу ў абследаванні бюджэту часу будуць прыцягнуты 6 тыс. дамашніх гаспадарак усіх абласцей Беларусі і Мінска. Прадставіць інфармацыю аб выкарыстанні свайго часу будзе прапанавана ўсім членам гэтых хатніх гаспадарак ва ўзросце 10 гадоў і больш. Удзел у абследаванні добраахвотны.
"Органы дзяржаўнай статыстыкі гарантуюць канфідэнцыяльнасць прадастаўленай насельніцтвам у ходзе абследавання асабістай інфармацыі, якая будзе выкарыстоўвацца выключна для фарміравання афіцыйнай статыстычнай інфармацыі ў сярэднім па рэспубліцы, абласцях і Мінску, па асобных сацыяльна-дэмаграфічных групах насельніцтва, - дадалі ў камітэце. - Якасць афіцыйнай статыстычнай інфармацыі , атрыманай па выніках абследавання, і эфектыўнасць сацыяльнай палітыкі, заснаванай на гэтых звестках, залежаць ад актыўнасці рэспандэнтаў і паўнаты атрыманай ад іх інфармацыі. Таму ўдзел у абследаванні бюджэту часу кожнага асобна ўзятага члена хатняй гаспадаркі - каштоўны ўклад у забеспячэнне поспеху яго правядзення".- 0-
Крыніца: БЕЛТА
Усе навіны