У адказе і наймальнік, і работнік

Семінар па ахове працы прайшоў на базе філіяла “Магілёўскі водаканал” унітарнага вытворчага камунальнага прадпрыемства водаправодна-каналізацыйнай гаспадаркі “Магілёўаблвадаканал”.

Работы ў калодзежах, земляныя і агнявыя работы, перавозка балонаў з газам, прымяненне грузапад’ёмных механізмаў, слясарнага і ручнога электрычнага інструмента – усё гэта звязана з высокай ступенню рызыкі. Таму, як было адзначана на семінары, на прадпрыемстве надаецца асаблівая ўвага такім напрамкам, як забеспячэнне сродкамі індывідуальнай абароны, своечасовае правядзенне медыцынскіх аглядаў, навучанне і праверка ведаў, укараненне сістэмы кіравання аховай працы па версіі СТБ 45001, дадатковы кантроль грамадскімі інспектарамі працы. Прычым робіцца стаўка на асабістую зацікаўленасць работнікаў. Так, з аднаго боку, тут уведзена і выкарыстоўваецца ў дачыненні да парушальнікаў сістэма папераджальных талонаў. Але з іншага, дзякуючы палажэнню аб прэміраванні, існуе магчымасць заахвочвання за добрасумленнае стаўленне да бяспекі.

Пры гэтым, як падкрэсліў першы намеснік начальніка Магілёўскага абласнога ўпраўлення Дэпартамента дзяржінспекцыі працы Д. У. Малахаў, адным з фактараў прафілактыкі траўматызму з’яўляецца прынцыповасць. І гаворка не толькі пра безумоўнае прыцягненне да адказнасці службовых асоб – цяперашняе заканадаўства дазваляе прымаць меры адміністрацыйнага спагнання ў выглядзе штрафу і ў дачыненні да работнікаў-парушальнікаў.

С. І. ГРЫБ, otsz.by

Усе навіны