З Мінска ў Хатынь шляхамі памяці
Зноў трывожна гучаць званы Хатыні: у Беларусі ўспамінаюць журботную дату – 22 сакавіка 1943 года.
Менавіта ў гэты дзень фашыстамі была спалена разам з жанчынамі, дзецьмі і старымі мірная вёска. Праз 79 гадоў пасля трагедыі па традыцыі ўшанаваць памяць аб іх і ўскласці кветкі да мемарыяла вырашылі прадстаўнікі дзяржаўных і грамадскіх арганізацый. У іх ліку – супрацоўнікі Міністэрства працы і сацыяльнай абароны, падпарадкаваных арганізацый, рэдакцыі часопіса “Ахова працы і сацыяльная абарона”, члены Беларускага грамадскага аб’яднання ветэранаў.
Як вядома, страшны лёс Хатыні падзялілі яшчэ 186 сёлаў і вёсак Беларусі, а ўсяго на сёння вядома пра 9 200 населеных пунктаў, якія былі зруйнаваныя захопнікамі і многія, як Хатынь, не адрадзіліся. Але менавіта памяць і ёсць тая спадчына, якую пакінулі нам загінулыя вёскі і іх жыхары. Год гістарычнай памяці абавязвае да ўстанаўлення ўсіх фактаў ваенных гадоў.
– З кожным годам сведкаў тых падзей становіцца ўсё менш. Сёння ў нашай краіне пражываюць крыху больш за 2 тысячы ветэранаў Вялікай Айчыннай вайны і каля 10 тысяч пацярпелых ад яе наступстваў, – адзначыла намеснік Міністра працы і сацыяльнай абароны М. Б. Арцёменка. – Яны заўсёды знаходзяцца ў цэнтры ўвагі сацыяльных службаў – ад арганізацыі догляду да вырашэння бытавых пытанняў. У мінулым годзе прыняты Указ Прэзідэнта Рэспублікі Беларусь аб штогадовай матэрыяльнай дапамозе ветэранам да Дня Перамогі. Акрамя гэтага, нашы ветэраны кожны месяц атрымліваюць спецыяльныя выплаты да пенсіі. Нараўне з вырашэннем матэрыяльных праблем важна захаваць для будучых пакаленняў рэальныя пасведчанні ўдзельнікаў страшных падзей ваенных гадоў. Сабраць і задакументаваць гісторыю кожнага ветэрана заклікана акцыя “Ганаруся подзвігам ветэрана-земляка”, якая па ініцыятыве Міністэрства пройдзе сёлета ва ўсіх раёнах Беларусі.
Усе навіны