Ліпень: спякотна не толькі на вуліцы
Сёлетні ліпень, які характарызуецца рэкордна высокімі тэмпературамі, таксама адзначаны шэрагам фактаў вытворчага траўматызму з цяжкімі наступствамі.
Як паведамляе сайт Следчага камітэта Рэспублікі Беларусь, у гэтыя дні ў рэанімацыйнае аддзяленне УАЗ “Барысаўская ЦРБ” з механічнай траўмай была дастаўлена маладая дзяўчына.
Як устанавіла следства, раніцай яна прыйшла працаўладкоўвацца на адно з прамысловых прадпрыемстваў Барысава. Начальнік вытворчасці і майстар участка правялі дзяўчыну ў цэх, дзе намотчыца станка стала знаёміць яе з работай абсталявання, але адцягнула сваю ўвагу на запіс у журнале. Здарэнне адбылося імгненна. Павярнуўшыся, яна ўбачыла дзяўчыну на падлозе, пры гэтым частка яе валасоў была наматаная на станок. Пацярпелую тэрмінова даставілі ў гарадскую медустанову ў цяжкім стане.
У гэты ж дзень у Любанскую райбальніцу з траўмамі абедзвюх ступняў быў дастаўлены слесар-электрык аднаго з прадпрыемстваў. Як высветлілі следчыя, траўма была атрымана падчас пуцерамонтных работ на чыгуначным участку каля вёскі Ператокі Любанскага раёна. З-за шуму уключанага электраінструмента слесар-электрык не пачуў гук рамонтнай машыны, якая набліжалася да яго. На жаль, наезду пазбегнуць не ўдалося, але машыніст аказаў слесару першую дапамогу, перавязаў яму канечнасці і выклікаў на месца здарэння лекараў.
Па дадзеных фактах тэрытарыяльныя аддзелы Следчага камітэта праводзяць праверкі з прызначэннем судова-медыцынскіх экспертыз, апытаннем відавочцаў, устанаўленнем прычын і ўмоў, якія прывялі да выпадкаў цяжкага вытворчага траўматызму.
Ю. А. Бяствіцкі, otsz.by
Усе навіны