Высвятляюцца акалічнасці выбуху цвёрдапаліўнага катла
Бераставіцкі райаддзел Следчага камітэта Рэспублікі Беларусь расследуе прычыны атрымання тэрмічных апёкаў 37-гадовым работнікам аднаго з мясцовых сельгаспрадпрыемстваў. Як паведамляе сайт Следчага камітэта, сярод асноўных версій здарэння – парушэнне патрабаванняў аховы працы.
Следствам устаноўлена, што жывёлавод падчас начнога дзяжурства на малочна-таварным комплексе распаліў цвёрдапаліўны кацёл, а затым пайшоў аглядаць ферму. Праз некаторы час, вярнуўшыся ў кацельнае памяшканне, ён адкрыў топку, пасля чаго адбыўся магутны выбух з выкідам гарачай пары.
Згодна з матэрыяламі крымінальнай справы, у арганізацыі заставаўся адкрытым доступ да кацельнага памяшкання, прытым што адказная асоба па абслугоўванню катла не была прызначана. Запальваў кацёл без дазволу па сваім жаданні любы з работнікаў. Пацярпелы жывёлавод таксама не атрымліваў дазвол-допуск у якасці асобы, якая адказвае за забеспячэнне працы цеплавой гаспадаркі. Эксплуатацыя катла з сур'ёзнымі парушэннямі прывяла да НЗ і паслужыла падставаю для распачынання крымінальнай справы па ч. 1 арт. 306 Крымінальнага кодэкса Рэспублікі Беларусь (парушэнне правілаў аховы працы, што пацягнула па неасцярожнасці прычыненне менш цяжкага цялеснага пашкоджання). Следчыя запатрабавалі неабходную тэхнічную дакументацыю, а таксама звесткі аб праходжанні работнікамі малочна-таварнай фермы інструктажоў па тэхніцы пажарнай бяспекі і ахове працы.
Ю. А. Бяствіцкі, otsz.by
Усе навіны