Выдавецтва рыхтуе падарункі
Напярэдадні навагодніх і калядных святаў РУП “Выдавецтва Беларуская Энцыклапедыя імя Петруся Броўкі” прапануе ўстановам краіны набыць для падшэфных школ, дзіцячых дамоў і дамоў сямейнага тыпу кнігі беларускіх і замежных аўтараў. Выдатным падарункам, на думку выдаўцоў, кнігі могуць стаць і для юных удзельнікаў агульнарэспубліканскай дабрачыннай навагодняй акцыі “Нашы дзеці”.
Спіс новых выданняў вялікі, у многіх з іх у займальнай форме распавядаецца пра культуру, гісторыю і прыроду Беларусі. Як разлічваюць у РУП “Выдавецтва “Беларуская Энцыклапедыя імя Петруся Броўкі”, маляўнічыя і змястоўныя кнігі прынясуць дзецям розных узростаў масу станоўчых эмоцый, стануць надзейным дарадцам і правадніком у свет нязведанага.
Малодшым школьнікам адрасавана аповесць-казка папулярнага беларускага пісьменніка А. Карлюкевіча “Прыгоды Максімкі на Бацькаўшчыне і ў розных краінах свету”. З яе галоўным героем можна пабываць на такім загадкавым кантыненце, як Афрыка, акунуцца ў свет пацешных прыгод.
А з кнігай “У пагоні за ветрам” чытачы зробяць падарожжа ў свет свабодалюбных вятроў, даведаюцца, адкуль яны бяруцца, як вымераць іх сілу і ці можна злавіць.
Многія выданні прынясуць і практычную карысць. У прыватнасці, кніга “Як быць героем ў небяспечнай сітуацыі” распавядае пра тое, як правільна дзейнічаць у надзвычайных абставінах, выйсці з іх цэлым.
Выдавецтва гатова арганізаваць дастаўку кніг заказчыкам, аказаць кансультацыйна-інфармацыйную падтрымку.
Ю. А. Бяствіцкі, otsz.by
Усе навіны