Смалявіцкі раённы аддзел Следчага камітэта Рэспублікі Беларусь устанаўлівае абставіны гібелі двух работнікаў у ходзе лесанарыхтоўкі.
Пра трагедыю, якая адбылася на адной з дзялянак Смалявіцкага лясніцтва Мінскай вобласці, дзе былі знойдзены целы 61-гадовага жыхара Барысава і 45-гадовага жыхара Гомельскай вобласці, паведамляе сайт Следчага камітэта Рэспублікі Беларусь.
Вядома, што мужчыны выконвалі работы па валцы лесу, але былі смяротна траўмаваныя падпілаваным імі дрэвам. Следча-аператыўнай групай у ходзе агляду месца здарэння зафіксавана следавая карціна, праведзены праверачныя мерапрыемствы. Па факце смерці па неасцярожнасці (ч. 1. арт. 144 Крымінальнага кодэкса Рэспублікі Беларусь) распачата крымінальная справа. У рамках расследавання здарэння прызначаныя судова-медыцынскія экспертызы, запатрабавана неабходная дакументацыя, якая тычыцца арганізацыі нарыхтоўкі драўніны на гэтым участку і іншых прававых адносін.
Асаблівая ўвага надаецца усталяванню прычын і ўмоў, якія садзейнічалі трагічнаму выпадку. Канчатковая прававая ацэнка таму, што адбылося, будзе дадзена па выніках следчых і працэсуальных дзеянняў.
Ю. А. Бяствіцкі, otsz.by
Усе навіны