Калі не хапае сродкаў для выплаты дапамогі

Плацельшчыкамі абавязковых страхавых узносаў у бюджэт дзяржаўнага пазабюджэтнага фонду сацыяльнай абароны насельніцтва Рэспублікі Беларусь з'яўляюцца работадаўцы, грамадзяне і фізічныя асобы, якія працуюць і самастойна выплачваюць узносы. Пры гэтым іншым разам узнікае пытанне:  што рабіць, калі сумы налічаных узносаў, што падлягаюць выплаце у бюджэт фонду, недастаткова для выплаты дапамогі?

У выпадках перавышэння сумы наяўнай дапамогі, якая выплачваецца са сродкаў дзяржаўнага сацыяльнага страхавання, над сумай плацяжоў у бюджэт фонду, а таксама несвоечасовай выплаты зарплаты пералік сродкаў на выплату дапамогі ажыццяўляецца абласнымі (Мінскім гарадскім) упраўленнямі Фонду.

Пры звароце па фінансаванне плацельшчыкі прадстаўляюць у раённыя, гарадскія і раённыя ў гарадах аддзелы (сектары) абласных упраўленняў Фонду наступныя дакументы:

– заяўку (арыгінал) на атрыманне грашовых сродкаў для выплаты дапамогі пры перавышэнні сумы наяўнай дапамогі над сумай плацяжоў у бюджэт фонду альбо ў сувязі з несвоечасовай выплатай зарабатнай платы (у трох экземплярах);

– ведамасную справаздачнасць «Справаздача аб сродках бюджэту дзяржаўнага пазабюджэтнага фонду сацыяльнай абароны насельніцтва Рэспублікі Беларусь» (справаздача 4-фонд);

– завераныя копіі дакументаў, якія пацвярджаюць абгрунтаванасць прызначэння і правільнасць вылічэння дапамогі. Пры фінансаванні дапамогі з-за часовай непрацаздольнасці, а таксама па цяжарнасці і родах ў абавязковым парадку прадстаўляецца лісток непрацаздольнасці, разлік дапамогі, штатны расклад, ведамасці налічэння заработнай платы за разліковы перыяд, табелі ўліку працоўнага часу, графікі працы, палажэнне аб аплаце працы, палажэнне аб прэміраванні. Таксама неабходныя дакументы, якія пацвярджаюць вызваленне ад працы ў разліковым перыядзе (лісткі непрацаздольнасці, загады). Пры фінансаванні дапамогі сем'ям, што выхоўваюць дзяцей, неабходна прад’явіць копіі дакументаў, якія дазваляюць вызначыць абгрунтаванасць і правільнасць прызначэння такіх дапамог;

– копіі дакументаў, якія пацвярджаюць знаходжанне плацельшчыка ў стадыі ліквідацыі, банкруцтва, адсутнасць вядзення фінансава-гаспадарчай дзейнасці (пры іх наяўнасці) і іншых дакументаў, неабходных для разгляду заяўкі.

Раённыя аддзелы на падставе прадстаўленых дакументаў на працягу пяці рабочых дзён правяраюць абгрунтаванасць прадстаўленай плацельшчыкам заяўкі і правільнасць прызначэння дапамогі. Пасля гэтага адзін асобнік заяўкі вяртаецца плацельшчыку, другі – накіроўваецца ва ўпраўленні Фонду для пералічэння сродкаў плацельшчыку, трэці – застаецца ў раённым аддзеле.

Упраўленне Фонду на працягу пяці рабочых дзён пасля атрымання заяўкі плацельшчыка з раённага аддзела разглядае і прадстаўляе ў орган казначэйства плацёжную інструкцыю на пералік сродкаў для выплаты дапамогі на бягучы (разліковы) рахунак плацельшчыка,  на рахунак, адкрыты для ўліку сродкаў фонду, або на рахунак атрымальніка дапамогі (пры адсутнасці бягучага (разліковага) рахунку ў плацельшчыка або немагчымасці праходжання па ім грашовых сродкаў) альбо пісьмова паведамляе плацельшчыку аб прычынах адмовы ў пералічэнні сродкаў.

Варта адзначыць, што сума сродкаў, пералічаная органамі Фонду арганізацыям на выплату дапамогі, адлюстроўваецца ў справаздачы 4-фонд па радку 014.

Пералік плацельшчыкам сродкаў для выплаты дапамогі не ажыццяўляецца ў наступных выпадках:

– адмова плацельшчыкаў ад прадстаўлення дакументаў, якія пацвярджаюць абгрунтаванасць названай у заяўцы сумы сродкаў і правільнасць прызначэння дапамогі;

– падлік дапамогі з парушэннем заканадаўства;

– падлік дапамогі на падставе лісткоў непрацаздольнасці, аформленых з парушэннем устаноўленых патрабаванняў;

– завышэнне плацельшчыкамі памераў дапамогі.

К. А. Раманоўская, намеснік начальніка Цэнтральнага раённага аддзела Мінскага гарадскога ўпраўлення Фонду сацыяльнай абароны насельніцтва Міністэрства працы і сацыяльнай абароны

Усе навіны